Shkarkohen 80% e policëve rrugorë! |
Nga: Radio SHARRI
|
e Hënë, 23 Shtator 2013 15:45 |
Tiranë, 23 shtator 2013 - Ministri i Brendshëm i Shqipërisë, Saimir Tahiri, ka marrë masa drastike ndaj Policisë Rrugore të Tiranës, duke urdhëruar shkarkimin e 80% të punonjësve të saj. “Largohen nga strukturat e Policisë së Qarkullimit Rrugor të Tiranës, rreth 80% të pjesëtarëve të këtij Komisariati, me urdhër të ministrit të Brendshëm, Saimir Tahiri”, thuhet në komunikatën e kësaj ministrie, duke shtuar se Drejtoria e Përgjithshme e Inspektimit dhe Shërbimi i Kontrollit të Brendshëm, kanë kryer një hetim të gjerë, lidhur me zbatimin e ligjshmërisë dhe standardeve, gjatë kryerjes së detyrës. “Nga hetimi, ka rezultuar se po bëhen shkelje të rënda në ushtrimin e detyrave funksionale, si dhe akte abuzive me dokumente, nga ana e 11 oficerëve dhe 77 policëve në bazë. Që të gjithë janë larguar nga Komisariati i Qarkullimit Rrugor në Tiranë dhe janë vënë në dispozicion të Drejtorisë së Personelit në Drejtorinë e Policisë së Qarkut të Tiranës”, thuhet më tej në deklaratën e Ministrisë.
|