Dragash, 05 prill 2013 – Sot është mbajtur mbledhja e parë e Këshillit Komunal për Siguri në Bashkësi (KKSB) në Dragash, pas zgjedhjes së anëtarëve të rinj, përkatësisht riemërimit të atyre që ishin edhe më parë dhe zëvendësimit të disa prej tyre, si dhe plotësimit me një anëtar të nacionalitetit goran.
Pavarësisht se themelimi i këtij këshilli është cilësuar nga LDK-ja, si njëpartiak, i themeluar vetëm nga anëtarët e PDK-së, mbledhja e sotme i ka dhënë legjitimitet të plotë KKSB-së, në këtë përbërje. Më vonë, Këshilli Lokal për Siguri Publike (KLSP), ka mbajtur takim në ambientet e nënstacionit policor në fshatin Krushevë, ku është diskutuar për gjendjen e sigurisë në këtë trevë, ku gravitojnë fshatrat kufitare (Restelicë, Krushevë, Zlipotok, Globoçicë). Kryetari i këtij këshilli lokal, Behar Brenolli, të pranishmit i ka njoftuar me atë që është diskutuar sot në Dragash, në Këshillin Komunal për Siguri në Bashkësi (KKSB). Në këtë takim është vendosur që të kërkohet në vazhdimësi shërbim 24-orësh të nënstacionit policor në Krushevë. Ky këshill është zotuar që t’iu drejtohet organeve më të larta shtetërore, që kjo kërkesë të merret parasysh. Gjithashtu, në takim u tha se ky këshill do të punojë me banorët e kësaj treve, që t’i bind ata për një bashkëpunim më të mirë me policinë dhe organet tjera shtetërore.
Më herët, drejtuesit e stacionit policor në Dragash, janë ankuar para delegatëve të Kuvendit Komunal të Dragashit, se banorët nga treva e Gorës nuk po bashkëpunojnë fare me Policinë e Kosovës. Nga ana tjetër, disa nga zyrtarët komunalë nga kjo trevë, patën thënë se banorët e kanë humbur besimin tek policia, pasi, sipas tyre, kjo e fundit nuk po iu përgjigjet ankesave të banorëve nga kjo trevë, lidhur me vjedhjet e shumta që po iu ndodhin.
|