Granatë në ndërmarrje, plagoset roja! |
Xërxë, 02 maj 2013 - Policia e Prizrenit ka njoftuar se një granatë dore është hedhur mbrëmë rreth mesnatës, në oborrin e ndërmarrjes “Xerxa” në fshatin Xerxë të Rahovecit, me ç’rast është plagosur rojtari i objektit. Policia, e cila e ka cilësuar këtë rast si “shkaktim i rrezikut të përgjithshëm”, ka bërë të ditur sot se mjeti shpërthyes ishte një granatë dore e llojit F-1.
Roja i objektit, i cili ka marrë lëndime, është dërguar fillimisht në Spitalin Rajonal të Gjakovës për trajtim mjekësor, e më pas është transferuar për në Qendrën Klinike Universitare të Kosovës, në Prishtinë. “Hetues policorë, krim teknika dhe hetues kundër mjeteve eksplozive, pranë policisë, kanë kryer procedurat e duhura hetimore në vendin e ngjarjes. Ende nuk dihen rrethanat e as motivi i këtij rasti”, tha zëdhënësi rajonal i policisë në Prizren, Hazir Berisha.
|