Femra nga Shqipëria, vritet në Prizren! |
Prizren, 04 qershor 2013 - Një femër e moshës mesatare, shtetase e Shqipërisë, është gjetur pa jetë, në një banesë, në lagjen “Bazhdarhane” të Prizrenit. Sipas hetimeve të para, dyshohet se viktima e moshës mesatare, të jetë ekzekutuar me thikë. Viktima ishte akomoduar në këtë banesë mbrëmë, bashkë me dy vëllezërit e saj.
Kryeprokurori i Prokurorisë Themelore në Prizren, së bashku me ekipet e specializuara për krime të rënda, pas marrjes së informacionit, kanë dalë në vendin e ngjarjes dhe i kanë kryer hetimet e para rreth rastit. Kryeprokurori, Sylë Hoxha, citohet të ketë thënë se vrasja është kryer me mjet të mprehtë dhe se nuk ka ende të dyshuar. Sipas tij, hetimet e para çojnë në dyshimet se viktima, së bashku me dy vëllezërit e saj, është akomoduar mbrëmë në këtë banesë, të cilën e kanë marrë me qira, ndërsa rasti është raportuar nga pronari i banesës.
|