Shtëpia e Ukshin Hotit – Muze! |
Rahovec, 18 qershor - Në Krushë të Madhe, komuna e Rahovecit, dje përfundoi faza e parë e punimeve në restaurimin e Shtëpisë Muze të Ukshin Hotit. Në inaugurimin e kësaj faze morën pjesë përfaqësues të institucioneve të Kosovës, familjarë të dëshmorëve, si dhe qytetarë të shumtë. Kryetari i Rahovecit, Smail Latifi, në këtë ceremoni, tha se kjo shtëpi do të jetë me karakter informues për gjeneratat e reja, të cilat do të kenë mundësi të njoftohen me punën dhe angazhimin e Ukshin Hotit. Hapjen e shtëpisë muze të Ukshin Hotit, e përshëndeti edhe Zyra e Presidencës së Kosovës, si dhe përfaqësuesi i Vetëvendosjes, Glauk Konjufca. Kjo është vetëm faza e parë e punimeve në këtë shtëpi muze, sepse ka edhe shumë punë që ky projekt të jetë plotësisht funksional. Për këtë, institucionet lokale kanë kërkuar ndihmën e Qeverisë së Kosovës dhe të Shqipërisë. Ky aktivitet në shtëpinë e Ukshin Hotit, u bë në datëlindjen e 70-të të tij, ku në ambientet e saj janë ekspozuar fotografi dhe disa nga mjetet e punës së Ukshin Hotit, që përkujtonin veprimtarinë e tij. Ukshin Hoti është zhdukur, mënjëherë pas lirimit nga Burgu i Dubravës, në maj të vitit 1999. Që atëherë, ende nuk dihet gjë për fatin e tij. Ai i vuajti shumë vjet burg, për shkak të angazhimeve për Kosovën e lirë, me synim bashkimin me Shqipërinë.
|