( Ora 22:30 ) - Rezultatet aktuale, të cilat janë siguruar nga KQZ-ja, tregojnë se kandidati i PDK-së, Salim Jenuzi, kryeson garën e zgjedhjeve për kryetar të Dragashit, me gjithsej 36.35% të votave. I dyti radhitet kandidati i LDK-së, Fatmir Mehmeti, me 31.58% të votave. Ndërkaq, në vendin e tretë radhitet kandidati nga treva e Gorës, Safet Kushi, i cili garon nga lista e CDU-së, me 13.8% të votave.

( Ora 21:30 ) - Kanë mbërritur edhe rezultatet nga fshatin Bresanë, sipas të cilave, Salim Jenuzi (PDK) kryeson me 734 vota, kundrejt Fatmir Mehmetit (LDK), i cili ka marrë 631 vota.
Ndërkaq, në këtë fshat, numër të madh votash ka marrë edhe kandidati i AAK-së, Selami Saiti, gjithsej 446 vota.

( Ora 21:00 ) - Sipas të dhënave nga selia e degës së PDK-së në Dragash, rezulton se kandidati i këtij subjekti politik është në avantazh, kundrejt atij nga LDK-ja, me rreth 100 vota. Megjithatë, ende nuk ka një rezultat përfundimtar, pasi të dhënat mungojnë në disa fshatra, siç janë ato nga fshati më i madh në Opojë, Bresana.

( Ora 19:00 ) Sipas rezultateve paraprake, të cilat i ka siguruar redaksia jonë, kandidati i LDK-së për kryetar të Dragashit, Fatmir Mehmeti, është në avantazh, kundrejt kandidatit të PDK-së, Salim Jenuzit. Këto rezultate ende nuk janë zyrtare, por janë të bazuara në numërimet e gjertanishme. Komisioni Qendror i Zgjedhjeve i ka plotësuar të dhënat për përqindjen e pjesëmarrjes në votime, në zgjedhjet lokale që u mbajtën sot në Kosovë. Sipas këtij raporti, përqindja e nënshkrimeve të zgjedhësve nga votuesit e regjistruar, deri në ora 19:00, nga vendvotimet që kanë dërguar të dhënat, është 47.91 për qind. Ndërkaq, kandidati goran nga lista e CDU-së, Safet Kushi, radhitet në vendin e tretë në nivel të komunës së Dragashit, me 13.92% të votave.Numërimi po vazhdon dhe, në çdo çast presim edhe rezultatet që do të na i konfirmojnë partitë politike.