• Rubrikat •
• Kërkimi i Shpejtë •
• Dita e FLAMURIT •
edhe:
Gëzuar!
FSK-ja me armë, e hidhëron KFOR-in! |
e Shtunë, 06 Mars 2010 19:22 |
Parakalimi i Forcave të Sigurisë së Kosovës (FSK) me armë, në ditën e parë të manifestimit “Epopeja e UÇK-së”, ka shkaktuar pakënaqësi të madhe tek kreu i forcave paqeruajtëse të KFOR-it, i cili gjatë ditës së premte, madje ka shqyrtuar edhe mundësinë e ngrirjes së marrëdhënieve me FSK-në. Reagimin e këtillë e ka kumtur “Koha Ditore”, e cila është njoftuar për këtë nga burime të sigurta të saj.
Këtë reagim e ka konfirmuar edhe shefi i Zyrës për media i KFOR-it, koloneli Hans Peter Buh, i cili ka thënë se KFOR-i ka kërkuar që gjatë manifestimit pjesëtarët e FSK-së të mos paraqiten me armë, mirëpo një gjë e tillë, sipas tij, është shpërfillur. “FSK-ja nuk ka pasur leje të bartë armë sot”, ka thënë Buh, duke bërë të ditur se, me gjithë diskutimet e zhvilluara gjatë ditës, KFOR-i ende nuk ka marrë vendim për masat, duke mos përjashtuar edhe mundësinë e shkëputjes së marrëdhënieve me FSK-në. “Jemi duke e diskutuar edhe këtë, por do të shohim se cili do të jetë vendimi përfundimtar”, ka thënë Buh. Një deklaratë të tillë nuk ka mundur ta besonte Zyra e Kryeministrit të Kosovës, Hashim Thaçi, nën patronazhin e të cilit edhe është bërë organizimi i gjithë manifestimit për “Epopenë e Ushtrisë Çlirimtare të Kosovës”. Këshilltari i kryeministrit, Shaip Muja, ka thënë se kjo informatë, më shumë është pjesë e “bulevardeve të gazetarëve”, sesa diçka zyrtare. “Nuk e besoj se për një çështje të tillë mund të ngrihen marrëdhëniet. Se kemi rënduar askënd dhe nuk besoj se kjo informatë është përcjellë nga NATO-ja”, ka deklaruar Muja për gazetën nëpërmjet telefonit, duke shtuar se armët janë pjesë e Gardës ceremoniale. “Nuk është ajo bartje e armëve, por është pjesë përbërëse e Gardës, që i jep kuptim asaj. Nuk e di se si e ka komentuar KFOR-i këtë. Ne s’kemi diçka zyrtarisht ende dhe nuk besoj që NATO-ja i prish raportet për një çështje aq minore dhe për një çështje kaq domethënëse”, ka thënë këshilltari Muja, sipas të cilit Qeveria e Kosovës, përkatësisht Këshilli organizativ i Epopesë, nuk ka marrë kurrfarë paralajmërimi për bartjen apo jo të armëve nga pjesëtarë të FSK-së. “Kjo është gardë për respektimin e delegacioneve që vijnë në Kosovë ose për ceremoni mortore. Ne jemi duke u bërë shtet dhe, nëse dikujt i pengon që ceremonia të mos përcillet me këtë simbolikë, mendoj që nuk është e nevojshme të komentohet”, ka thënë Muja, duke theksuar vazhdimisht se nuk është në dijeni për ndonjë reagim të KFOR-it. Ndërkohë, as Ministria e Forcës së Sigurisë e Kosovës, gjatë ditës së premte nuk ka pasur ndonjë informacion për “hidhërimin” e KFOR-it. “Ne nuk kemi marrë diçka konkrete për atë që po thoni. S’kemi ndonjë reagim konkret dhe nuk e dimë nga ka ardhur ky reagim. FSK-ja ka qenë e pranishme me agjendë të Qeverisë dhe i është përmbajtur agjendës së Këshillit organizativ, që ka qenë nën patronazhin e kryeministrit Hashim Thaçi”, ka deklaruar zëdhënësi i Ministrisë së FSK-së, Ibrahim Shala.
Nga ana tjetër, presidenti Fatmir Sejdiu beson se mund të jetë keqkuptuar deklarata e një zyrtari të KFOR-it, i cili në një prononcim për media, nuk e ka përjashtuar mundësinë e ngrirjes së raporteve të KFOR-it me FSK-në, për shkak se pjesëtarët e kësaj force kanë bartur armë gjatë manifestimit “Epopeja e UÇK”-së. “Mund të ketë ndonjë keqkuptim. Nuk dua të jap ndonjë koment, pasi që nuk kam burime”, ka thënë presidenti Sejdiu, duke iu përgjigjur interesimit të gazetarëve, në lidhje me deklarimet e shefit të Zyrës së Informimit të KFOR-it, Hans Peter Buh.
“KFOR-i është investues i rëndësishëm i rritjes së Forcës së Sigurisë së Kosovës dhe ju e dini që Forca e Sigurisë, të gjitha lëvizjet e gjertanishme, i ka bërë në partneritet me ta. Mendoj që në të ardhmen, natyrisht se do të jetë kontribuues për lëvizjet tona sa më të shpejta, në anëtarësim në NATO”, është shprehur Sejdiu.
|