Në Mushtisht konfiskohet një arsenal armësh! |
Suharekë - Policia e Suharekës, gjatë bastisjes së një shtëpie në fshatin Mushtisht, ka zbuluar armë dhe një sasi municioni. Bastisja, sipas njoftimit të policisë, është bërë për shkak të dyshimit se një person, para ca ditësh kishte shtënë me armë, duke shkaktuar rrezik të përgjithshëm për qytetarët.
Gjatë bastisjes, policia ka gjetur një pushkë automatike AK 47, e prodhimit jugosllav, 2 karikatorë të këtij automatiku, 152 fishekë të kalibrit 7.62 mm, një pistoletë e tipit “Zastava”, e prodhimit jugosllav, me kalibër 7.65 mm, 8 fishekë të kalibrit të kësaj pistolete, një pushkë gjahu dygrykëshe, prodhim i panjohur, e kalibrit 16 mm, dhe një maskë të zezë. Zëdhënësi i policisë rajonale në Prizren, Hazir Berisha, tha se poseduesi i këtij arsenali të armëve dhe municionit është arrestuar.
|