Varrosen viktimat e tragjedisë së Restelicës |
Restelicë, 13 shkurt - Pasditen e sotme është bërë varrimi i nëntë viktimave të tragjedisë që goditi fshatin Restelicë të Gorës së Dragashit. Ndërkohë që është ndërprerë, për të vazhduar edhe nesër, operacioni i Forcës së Sigurisë së Kosovës, në kërkim të personit të njëmbëdhjetë të familjes Reka, që dyshohet se gjendet nën gërmadhat e shkaktuara nga orteku i së shtunës.
Operacioni pritet të vazhdojë nesër, konfirmoi komandanti i operacioneve të kërkim-shpëtimit në FSK, Mehmet Lladrovci, i cili thotë se janë bërë gërmime shumë të mëdha dhe se operacioni do të vazhdoj deri në gjetjen e personit të fundit. Për shkak të rrezikut që mund t’iu kanoset, shumë banorë të zonave ku është shfaqur orteku, janë zhvendosur në brendi të fshatit, ka bërë të ditur koordinatori i ekipit për shpëtim në fshatin Restelicë, imami Shaban Haxhia. Në ndërkohë, vogëlushja që i shpëtoi kësaj tragjedie, Asmira Reka, është lëshuar nga spitali i Prizrenit, pasi është rehabilituar plotësisht dhe, sipas mjekëve, ajo gëzon shëndet shumë të mirë. Aktualisht, Asmira ndodhet tek daja i saj, në Prizren.
|