Dragash, 16 shkurt - Kryesia e degës së LDK-së në Dragash, të enjten ka lëshuar një komunikatë për media, përmes së cilës kritikon pushtetin lokal të Dragashit, për faktin se nuk shpalli gjendje emergjente, ndonëse, sipas këtij subjekti më të madh opozitar në Dragash, gjendja në terren ishte si e till pas reshjeve të shumta të borës dhe ngjarjes tragjike që ndodhi në fshatin Restelicë. “Kryesia e degës së LDK-së në Dragash, në mbledhjen e mbajtur më 14.02.2012, reagon ndaj mospunës dhe papërgjegjësisë së pushtetit lokal, ndaj situatës së rëndë që po mbretëron në tërë territorin e Komunës, si pasojë e reshjeve të borës. Kryesia vlerëson se, pas gjendjes së krijuar, kryetari i Komunës ka pasur arsye të mjaftueshme për të shpallur gjendje emergjente në komunë”, thuhet mes tjerash në komunikatën e LDK-së, e cila pohon se vazhdimisht e ka përcjellë situatën në terren, ku ka konstatuar se pushteti lokal nuk po i kryen detyrat elementare. “Pushteti lokal nuk po e bën pastrimin e rrugëve nga bora, gjë që qytetarët e shumicës së fshatrave janë detyruar që të vetorganizohen për hapjen e rrugëve me lopata. Rruga për fshatin Pllajnik, Xërxe, Radeshë, Leshtan, Zlipotok, Kërstec, Dikanc e fshatra të tjerë, kanë qenë të pakalueshme, derisa është dashur që t’i hapin qytetarët me vetiniciativë. Gjithashtu edhe rruga Dragash-Restelicë nuk ishte mirë e pastruar dhe prej vendit të quajtur ‘Buka’ e deri në fshatin Restelicë, në ditën e rastit tragjik në këtë fshat, rruga ishte e papastruar nga bora. Ajo ka filluar të pastrohet të nesërmen, pas intervenimit të strukturave vendore e ndërkombëtare nga qendra. Edhe në fshatrat tjerë, ku rrugët janë disi të hapura, nuk mirëmbahen si duhet dhe ka shumë vështirësi në qarkullim. Gjithashtu, kompania e kontraktuar për mirëmbajtjen e rrugëve rajonale, Dragash - Prizren. Dragash - Restelicë, Dragash - Brod dhe Tyrbe e Plavës - Zaplluxhe, nuk i ka mirëmbajtur si duhet. Përkundër kësaj gjendje, kryetari nuk e ka pa të arsyeshme të shpall gjendje emergjente, gjë që po sjellë vështirësi për banorët e atyre fshatrave”, thuhet më tej në komunikatë, ku vlerësohet se kjo situatë e dobët ka mundur të rezultojë edhe me pasoja të tjera të paparashikueshme. “Kryetari nuk po e sheh të arsyeshme të bëj edhe pastrimin nga bora të qendrës së qytetit dhe trotuareve, gjë që në qytet është vështirësuar tej mase lëvizja e qytetarëve dhe makinave, e që ne brengosemi se edhe më shumë do të vështirësohet gjendja, kur të rifilloj procesi mësimor. Në këtë rast, nivelin e papërgjegjësisë së kryetarit të komunës, karshi kësaj situate, e dëshmon intervista e tijë në median qendrore, ku thotë se ‘ne jemi mësuar me këso borë dhe nuk kemi probleme’. I bëjmë thirrje pushtetit lokal, që ta merr me seriozitet gjendjen e krijuar dhe nevojat që kanë banorët e të gjitha lokaliteteve, për të mos ndodhur fatkeqësitë me pasoja të rënda për njerëzit”, thuhet në fund të komunikatës së degës së LDK-së në Dragash, të nënshkruar nga ushtruesi i detyrës së kryetarit, Fehmi Bojaxhiu.
Përpos kësaj komunikate, në të cilën kritikohet pushteti komunal, LDK-ja ka lëshuar edhe një komunikatë tjetër, përmes së cilës i ka shprehur ngushëllime familjes Reka nga Restelica, për tragjedinë e përjetuar, si dhe shëndet dhe fat të mbijetuarës së vetme nga kjo familje, Amserës.
|