Në Vërmicë kapen 10 kilogramë drogë! |
Vërmicë, 11 mars - Në pikëkalimin kufitar me Shqipërinë, në Vërmicë, të shtunën janë zbuluar 10 kilogramë substancë narkotike, e llojit marihuanë. E gjithë substanca është konfiskuar dhe njëkohësisht janë arrestuar dy persona. Lajmin e ka konfirmuar edhe policia, duke saktësuar se narkotikët po vinin nga Shqipëria, për tu futur në Kosovë. “Nga Republika e Shqipërisë po futej një autobus, në të cilin ndodheshin udhëtarë që po vinin nga Republika e Shqipërisë për në Republikën e Kosovës. Gjatë kontrollit të përbashkët nga Policia dhe Doganat e Kosovës, në autobus janë gjetur dhe konfiskuar 10 kilogramë e 515 gramë substancë narkotike, e dyshuar të jetë marihuanë si dhe janë arrestuar dy persona, me dyshimin e bazuar për blerje, shitje, shpërndarje dhe posedim të paautorizuar të narkotikëve të rrezikshëm dhe substancave psikotropike”, thuhet në njoftimin e policisë. Për hetime të mëtutjeshme, në vendngjarje kanë dalë Njësia për Hetimin e Narkotikëve si dhe Prokurori Publik i Qarkut dhe njësia e krim teknikes. Policia thotë se, nga hetimet preliminare në vend të ngjarjes, në bazë të informacioneve dhe verifikimeve të bëra, dyshohet se ngasësi i autobusit dhe shoqëruesi i tij, edhe në të kaluarën kanë pasur raste të tilla të kontrabandës me marihuanë dhe me armë e municion. “Me autorizim të prokurorit Publik të Qarkut, të dyshuarit Lazim D. (1955) dhe Roland J. (1971), janë ndaluar në polici për hetime të mëtutjeshme”, thuhet në komunikatën e policisë.
|